Tok Pisin
English
Jon 14:27, Aisaia 53:5, Rom 5:1 – Jisas i tok olsem, “Bel isi bilong mi, em mi givim long yupela… Olsem na yupela i no ken bel hevi na tingting planti, na yupela i no ken pret.” Bel isi Em i givim long yumi em i narapela kain bel isi. Na em bai stap oltaim oltaim.
Jon 14:27 – Planti taim yumi save mangalim bikpela fortnait, planti mani o kago.
Tasol, tingting long dispela. Sapos yu bungim bikpela hevi olsem yu lusim wanpela pikinini i dai, o yu kisim bikpela sik, long dispela kain taim, mani o kago bai givim bel isi long yu i stap oltaim oltaim, o nogat?
Jon 14:27 – Dispela graun i gat kainkain samting Satan i save yusim long givim bel isi long yumi. Kain olsem, mani, spak, drug (marasin nogut), pamuk… kainkain samting. Tasol ol dispela samting bai no inap givim yumi bel isi tru tru.
Tasol, Jisas i ken givim yumi narakain bel isi olgeta. Dispela kain bel isi bai stap wantaim yumi long taim bilong bel hevi, pret o tingting planti. Em bai stap oltaim oltaim!
Jon 14:27 – Taim yumi bungim hevi na traim, yumi save lukluk long yumi yet tasol. Taim Jisas i bungim hevi na kisim bagarap, Em i soim narapela kain pasin olgeta. Long dispela kain taim, Em i lus tingting long ol hevi na wari bilong Em yet na Em i wok long strongim ol disaipel na givim trupela bel isi long ol.
Jon 14:27, Jems 4:1 – Jisas i bin tokim ol disaipel bilong em, “Mi laik lusim yupela, na mi givim bel isi long yupela bai em i ken i stap long yupela.” Nau 2000 krismas i kamap bihain long dispela, yumi wanwan save bungim planti hevi na planti taim yumi no gat bel isi. Dispela bel isi Jisas i bin promis long givim long yumi, em i stap we nau?
Taim God i givim yumi ol bikpela o liklik samting, planti taim yumi i no save tok tenkyu long Em. Yumi no save stap amamas long ol dispela samting. Yumi save laikim samting moa o mangalim ol samting bilong narapela man. Sapos yumi mekim olsem, yumi stap amamas, o nogat?