As bilip bilong ol Reformed Sios em i kam long Buk Baibel tasol. Mipela samaraisim dispela bilip olsem:
- Mipela bilip olsem Tok bilong God i kamap long strong bilong Holi Spirit na em i tru olgeta na i nogat wanpela rong i stap insait long en. Em inap skulim yumi long olgeta samting bilong bilip na pasin yumi mas mekim long bihainim Krais.
- Mipela bilip olsem God em i God Triwan. Tru tumas, i gat God Papa, God Pikinini na God Holi Spirit ol i stap bipo, nau, na oltaim oltaim.
- Mipela bilip olsem God em i bikpela na bos bilong olgeta samting em i wokim, ples heven na graun wantaim. I min olsem em i bos bilong ol spirit, dimon, sanguma na pawa bilong tudak. Na em i bosim olgeta samting long strongim na blesim sios bilong Em.
- Mipela bilip olsem taim God i wokim man, man i nogat wanpela sin. Tasol, taim man i pundaun long sin na i dai long sin, i nogat wanpela man o meri inap kisim bek em yet long dispela bel hat bilong God long sin bilong ol. Nogat!
- Mipela bilip olsem God i makim sampela lain long olgeta hap bilong graun long stap wantaim Em oltaim oltaim. Dispela wok bilong God em i samting Em yet i mekim long gutpela pasin bilong En insait long wok bilong Krais. Em i no tingim nem o namba bilong yumi o wok yumi bin mekim taim Em i makim yumi.
- Mipela i bilip olsem Jisas Krais Em i pikinini tru bilong God i save stap oltaim oltaim. Wok bilong Krais, em inap long kisim bek olgeta lain God i makim pinis long kisim.
- Mipela bilip olsem long kisim selvesen na pas wantaim Krais yumi mas bilip tru long Krais pastaim, husat i bin kisim ples bilong yumi na pe bilong sin bilong yumi.
- Mipela bilip olsem nambawan wok bilong Holi Spirit em i samting bilong helpim yumi sinman long tanim bel na bilip long Bikpela Jisas Krais. Em i save yusim Tok bilong God long mekim yumi i go klostu long Krais long helpim yumi stap long nupela laip.
- Mipela bilip olsem i gat wanpela holi sios i stap long olgeta hap bilong dispela graun na olgeta bilip manmeri wantaim pikinini i mas kamap memba bilong dispela sios na stap insait long kontrak bilong God.
- Mipela bilip olsem Jisas Krais i stap pinis long heven na Em i sindaun long han sut bilong God Papa, na long las de Em bai i kambek long skelim olgeta man – em ol lain i dai pinis wantaim ol lain i stap laip. Mipela bilip tu olsem wanem ol lain God i kolim ol stretpela manmeri insait long bilip bilong ol bai i stap wantaim Em long dispela nupela graun oltaim oltaim, tasol ol lain i givim baksait long Bikpela bai bagarap oltaim oltaim long hel paia.
- Mipela bilip olsem olgeta hap bilong laip bilong yumi mas wok long givim glori long God na stap aninit long biknem o strong bilong Jisas Krais.
