Stap Olsem Trupela Papa long Pikinini bilong Yu Tude!

Sampela krismas i go pinis mi lukim wanpela piksa. Long dispela piksa wanpela papa i sindaun na wok long pilai wantaim pikinini bilong em. Pikinini i amamas stret. Na wanpels tok i stap aninit long dispela piksa, “Be a daddy to your child today.” “Stap olsem papa long pikinini bilong yu tude.”

Mi no inap stori planti long putim ples klia wanem samting i kamap long dispela kain piksa. Samting i kamap bikos papa i givim taim wantaim pikinini na em i amamas tru. Ol i wokim dispela piksa long soim olsem papa mas givim taim long pikinini na mekim em i amamas.

Be a daddy for your child today!

Wanpela evangelist long Amerika bin tokaut losem: “Wanem ol papa i laik kisim bikpela namba insait long kantri em ol papa i laik mekim gutpela wok long lavim na skulim gut pikinini bilong ol insait long haus pastaim.” Mi prea ol papa long dispela kantri PNG bai gat wankain tingting.

Narapela pastor i bin tok, “Sapos sindaun insait long family i no gutpela, yumi mas askim yumi yet, yumi papa i bin inapim olgeta wok samting yumi mas mekim long lukautim meri na pikinini, o nogat?“ Mi laik strongim yupela ol papa na helpim yupela long kamap olsem wanpela gutpela papa long pikinini bilong yupela. Mi laik bai Bikpela Jisas Krais i kisim biknem long haus bilong yupela wanwan.

Long helpim yumi bai mi mekim klia wanpela tok: DADDY.

Bai mi skelim wanwan leta bilong dispela tok: DADDY. Taim yumi pinis bai yumi klia gut long wanem kain daddy em i gutpela daddy o papa tru long ai bilong God na pikinini bilong em.

DADDY (Dedicated, Action, Directs, Disciplines and Yearns)

D = Dedicated
pikininiDispela tok ‘dedicated’ (o dedikeson) i min olsem yumi mas stap redi na faithful long pinisim olgeta wok bilong yumi tru tru. Em samting yumi papa mas mekim. Dispela kain papa em i no save ranawe long meri bilong em na pikinini. Nogat. Em save dediketim em yet tru tru long wok bilong em long helpim famili bilong em. I min olsem em i no lusim ol wok samting em i mas mekim long blesim femili bilong em. Mi tok tru long yu: meri na pikinini i lavim kain papa olsem. Hamaspela man ol i marit na promisim meri bilong ol olsem, ol bai i lukautim gut ol na lavim ol na pikinini wantaim. Tasol i no longtaim na sampela traim i kamap, narapela meri i grisim ol, na ol i lusim femili.

Tru tumas wanem ol papa i givim ol yet tru long femili bilong ol, ol stap Kristen. Ol i bilip tru long Krais, bikos ol i nidim strong bilong Krais long inapim ol dispela gutpela wok. Olsem na long kamap gutpela papa yumi mas givim yumi yet long Jisas pastaim. Olsem Baibel i tok long Kolosi 3:17, “Long toktok bilong yupela na long wok bilong yupela na long olgeta samting yupela i mekim, yupela i mas mekim long nem bilong Bikpela Jisas!”

Na dispela dedikeson long Krais em i karim kaikai insait long femili. Yumi bai lavim meri na pikinini bilong yumi. Na yumi bai painim taim long toktok wantaim pikinini na skulim ol long ol gutpela samting God i bin mekim. Yumi bai pilai wantaim ol. Yumi bai lavim ol. Yumi bai lukautim ol gut tru.

A = Action
Dispela tok Action (o Akson) em i man bilong wok na mekim ol samting i kamap. Yumi ken tok olsem em wanpela akson man. Kain papa olsem em i no lesman. Em i tingim Gutpela Sindaun 20:4, “Lesman i no save go brukim graun long gaden bilong en long taim bilong planim kaikai. Olsem na long taim bilong kisim kaikai i mau, em bai i go painin nating long gaden bilong en.” Ol gutpela papa em ol lain bilong painim rot long lukautim femili. Ol i save wok hat. Taim ol i kisim fortnait o sampela mani ol i no tingim ol yet na baim wanpela katon bia, nogat ol i putim nids bilong femili i go pas. Tru tumas, pikinini i lukim dispela kain pasin papa bilong ol i mekim na ol i amamas tru.

Na tu ol pikinini i save bihainim pasin bilong papa bilong ol yet. Mi save olgeta papa i laik bai pikinini i lainim pasin bilong wok. Long helpim pikinini yu mas stap olsem wanpela akson man. Yu noken kamap lesman! (Ritim Gutpela Sindaun 10:5; 15;19;22:13; 26:13,26 etc).

D = Directs
Dispela tok directs (dairiks) i min olsem givim stia long pikinini. Taim God i kirapim kontrak wantaim Abraham dispela pasin i stap bipo i kam inap long nau. Yumi mas lidim ol pikinini long tok bilong God.

Buk Song 145:4 “Ol lain manmeri i stap nau bai ol i tokaut long ol arapela lain i kamap bihain long ol samting yu mekim na bai ol i litimapim nem bilong yu.”

Efesus 6:4 i tok olsem, “Na yupela papa, yupela i no ken bagarapim tingting bilong pikinini bilong yupela na mekim ol i belhat long yupela. Nogat. Yupela i mas mekim gutpela pasin long ai bilong Bikpela, na stretim gut ol pikinini bilong yupela na skulim ol long tok bilong Bikpela.”

Skulim ol long tok bilong Bikpela i nambawan wok. Yumi mas dairiktim pikinini long Jisas Christ! Ol gutpela papa i save painim taim long sindaun wantaim wanwan pikinini bilong em na strongim ol. Gutpela papa i no save dairiktim ol pikinini wantaim pasin belhat na bikmaus. Nogat. Gutpela papa i save lidim ol long beten na bringim ol long trupela lotu we Krais i save kisim Biknem.

“Skulim pikinini bilong yu long bihainim gutpela pasin, na em bai i wokabaut long dispela rot inap long em i lapun tru.” Gutpela Sindaun 22:6.

D = Disciplines
Dispela tok discipline (disaplin) – em i olsem stretim pikinini taim ol i wokim rong. I gat tupela rot bilong stretim pikinini. Namba wan rot em i toktok. Pikinini i mas save olsem wanem samting em i stret na wanem samting i no stret. Pikinini mas klia tru long dispela. Tasol, sapos pikinini i bikhet, sakim tok, daunim yu o mama bilong en, papa i mas stretim em.

Gutpela Sindaun i tok olsem, “Sapos yu stretim pikinini na givim kanda long em, orait em bai i kisim gutpela tingting na save. Tasol sapos pikinini i bihainim laik bilong em yet oltaim, orait em bai i mekim mama bilong en i sem.”

Yumi mas pret liklik taim yumi disaplinim pikinini bilong yumi sapos yumi no inap bosim gut belhat bilong yumi. Planti pikinini i kisim taim bikos papa o mama i save belhat tumas. Dispela kain pasin bilong belhat na paitim pikinini em i rong long ai bilong God.

Olgeta taim yumi mas stretim pikinini wantaim lav. Lav! Pasim Laikim! Hau bai yumi stretim ol: rs, taim ol i mekim rong yu mas painim gutpela ples bilong stretim ol na tokim ol long wanem rong ol i bin mekim. Tu, yusim han bilong yu long paitim as bilong ol, na bihainim krismas bilong ol long painimaut hamaspela taim yu bai paitim ol. (Kain olsem, sapos em i gat tripela krismas, paitim as bilong em tripela taim). Tri, bihain long paitim ol yu tokim ol, “Mi lusim rong bilong yu na mi lavim yu.“ Na larim ol i go. Tasol, mi tok gen, no ken mekim wantaim belhat.

Mi askim yu papa: pikinini i save olsem yu lavim ol, o nogat? Buk Baibel i tok, “Bikpela i save stretim ol man em i laikim tumas.” (Hibru 12:6). Bikpela i lavim mipela. Bikpela i stretim mipela. Bikpela em i papa bilong mipela. Mipela mas mekim wankain olsem long pikinini bilong yumi – stretim pikinini wantaim lav!

Y = Yearns
Dispela tok yearns (yurns) em i nupela tok long planti lain, tasol em i gat gutpela mining. Em i min olsem yu gat bikpela laik na wari long bel bilong yu long ol pikinini bilong yu. Wanem krai na beten em i nambawan long laip bilong wanpela papa? Em i olsem em i save krai na beten long God olsem pikinini bilong em mas bihainim Tok bilong God, lavim God Triwan na pas gut wantaim Krais olgeta de long laip bilong ol. Klostu olgeta taim dispela beten bai karim kaikai insait long haus taim papa i save wok long skulim gut pikinini. Mi tokim yu stret: Ol papa o daddy i luk olsem sapos yu nogat dispela laik na krai long bel bilong yu, ating yu no t long kisim dispela nem papa. Trupela papa i gat bikpela hangre long skulim pikinini long Tok bilong God!

Tarangu, planti papa i no bisi long spiritman bilong pikinini na planti ol pikinini i bikhet na ol i no sindaun gut. Hamaspela pikinini i save bihainim rot nogut bilong papa bikos papa i wanpela giaman man, o stilman, o spakman o man bilong tok nogutim na paitim meri bilong en. Olsem na planti pikinini i save bihainim lek mak bilong papa bilong ol na stap wankain olsem papa bilong ol.

Olsem na yu daddy o yu papa, plis lukluk gut na skelim gut ol wokabaut bilong yu long ai bilong pikinini bilong yu. Plis lukluk long Krais na stap olsem papa bilong pikinini bilong yu tude, na olgeta de!

Be a DADDY to your child today!